ភ្នំពេញ៖ អ្នកនាំពាក្យក្រសួងអប់រំ លោក រស់ សុវាចា បានបញ្ជាក់ថា គម្រោងបង្កើតមុខវិជ្ជាសិក្សាវៀតណាមនៅសាកលវិទ្យាល័យភូមិន្ទភ្នំពេញ គឺជាគម្រោងដែលស្ថិតក្នុងការបង្កើតវិទ្យាសា្ថនសិក្សាអន្តរជាតិ និងគោលនយោបាយ។ លោកបញ្ជាក់ថាវាមិនខុសអ្វីពីការបង្កើតមុខវិជ្ជាសិក្សាភាសាថៃ ភាសាជប៉ុន ភាសាកូរ៉េ ភាសាបារាំង ភាសាចិន ដែលមានស្រាប់នៅសាកលវិទ្យាល័យនោះទេ។

លោក រស់ សុវាចា បានបញ្ជាក់ក្នុងសន្នីសិទសារព័ត៌មានរបស់អង្គភាពអ្នកនាំពាក្យរាជរដ្ឋាភិបាលនៅព្រឹកថ្ងៃអង្គារ៍ ទី១៦ ខែសីហា ឆ្នាំ២០២២នេះថា៖ «ខ្ញុំសូមគូសបញ្ជាក់ផងដែរថាកម្ពុជាវៀតណាមគឺបានធ្វើកិច្ចសហប្រតិបត្តិការពង្រឹងវិស័យអប់រំកម្រិងឧត្តមសិក្សាដូចជាកិច្ចសហប្រតិបត្តិការណ៍ដែលក្រសួងអប់រំ យុវជន និងកីឡា មានជាមួយបណ្ដាប្រទេសជាមិត្តទាំងអស់ដែលបាននឹងបន្តកំពុងកើតមានដើម្បីចូលរួមលើកកម្ពស់ការអប់រំ យុវជន និងកីឡាទៅតាមទិដ្ឋភាពជាក់ស្ដែង»។

លោកបញ្ជាក់ថាកម្ពុជាមានកិច្ចព្រមពៀងសហប្រតិបត្តិការវិស័យអប់រំ វិស័យឧត្តមសិក្សាកម្ពុជា-វៀតណាម ដែលមានតាំងពីឆ្នាំ២០០១ មកម្លេះ។

ការឆ្លើយតបរបស់អ្នកនាំពាក្យរូបនេះគឺដើម្បីឆ្លើយតបទៅនឹងមតិរិះគន់មួយចំនួនបន្ទាប់ពីមានព័ត៌មានថា សាកលវិទ្យាល័យភូមិន្ទភ្នំពេញ របស់កម្ពុជាគ្រោងបង្កើតមុខវិជ្ជាសិក្សាវៀតណាម ដែលពួកគេថាកំពុងយកឥទ្ធិពលពីប្រទេសវៀតណាមមកកាន់កម្ពុជា។

បើតាមលោក រស់ សុវាចា គម្រោងបង្កើតមុខវិជ្ជាសិក្សាវៀតណាមមានការបណ្ដុះបណ្ដាលថ្នាក់បរិញ្ញាបត្រចំនួន៣គឺ បរិញ្ញាបត្រសិល្បះសិក្សាវៀតណាម បរិញ្ញាបត្រសិល្បះភាសាវៀតណាមសម្រាប់ការបកប្រែ និងបរិញ្ញាបត្រសិល្បះភាសាវៀតណាមសម្រាប់ទំនាក់ទំនងធុរកិច្ច៕

^{PHOTO: EAC NEWS}